ລັກສະນະຂອງການວັດຜົນການສຶກສາ
ການວັດຜົນການສຶກສາເປັນການວັດຜົນໃນສິ່ງທີ່ເປັນນາມມະທຳ
ຈຶ່ງເປັນການວັດທີ່ຍາກ ກ່ວາການວັດຜົນສິ່ງທີ່ເປັນຮູບປະທຳ. ດັ່ງນັ້ນ
ການວັດຜົນການສຶກສາຈຶ່ງມີລັກສະນະດັ່ງນີ້.
ກ.
ການວັດຜົນການສຶກສາເປັນການວັດຜົນທີ່ບໍ່ສົມບູນ
ໃນຂະບວນການຮຽນການສອນວິຊາໃດໜຶ່ງນັ້ນ
ມັນມີລາຍລະອຽດຫຼວງຫຼາຍທີ່ສຸດຈົນຜູ້ສອນບໍ່ອາດສາມາດທີ່ຈະສ້າງຄຳຖາມໃຫ້ຄົບຖ້ວນໄດ້. ດັ່ງນັ້ນ, ຜູ້ສອນຈຶ່ງຈຳເປັນຕ້ອງເລືອກເອົາເນື້ອໃນທີ່ສຳຄັນຕອນໃດຕອນໜຶ່ງມາສ້າງເປັນຄຳຖາມ
ເພື່ອໃຫ້ນັກຮຽນຕອບແລ້ວຖືເອົາຜົນຂອງການຕອບນັ້ນມາຕີລາຄາເປັນຄະແນນຂອງວິຊານັ້ນ
ໆ ດ້ວຍເຫດນັ້ນຈຶ່ງຖືວ່າເປັນ ການວັດຜົນທີ່ບໍ່ສົມບູນ.
ຂ.
ການວັດຜົນການສຶກສາເປັນການວັດຜົນທາງອ້ອມ
ການວັດຜົນການສຶກສາບໍ່ອາດມີເຄື່ອງມືຊະນິດໃດທີ່ຈະວັດໄດ້ໂດຍກົງຄືກັບການວັດແທກລວງຍາວ
ແລະ ການຊັ່ງນ້ຳໜັກ. ການວັດຜົນການສຶກສາ
ເປັນການວັດສິ່ງທີ່ເຮົາບໍ່ສາມາດທີ່ຈະແຕະຕ້ອງໄດ້
ດັ່ງນັ້ນຈຶ່ງຕ້ອງຊອກຫາວິທີການຕ່າງໆມາປະຕິບັດ
ຈາກນັ້ນກໍ່ແປຜົນຂອງການວັດຜົນນັ້ນອອກມາເປັນຄະແນນ ແລະ
ແປຄວາມໝາຍຂອງຄະແນນນນັ້ນອີກຕໍ່ໜຶ່ງວ່າ ນັກຮຽນຜູ້ນັ້ນເກັ່ງ ຫຼື ອ່ອນ
ມີຄວາມຮູ້ໜ້ອຍຫຼາຍປານໃດ
ເຊີ່ງບໍ່ແນ່ໃຈວ່າເປັນການແປຄວາມໝາຍທີ່ຖືກຕ້ອງ ແລະ ຊັດເຈນ.
ຄ.
ການວັດຜົນການສຶກສາຍ່ອມມີຄວາມຜິດພາດ
ການວັດຜົນການສຶກສາເປັນການວັດໃນສິ່ງທີ່ເຮົາບໍ່ສາມາດຈະແຕະຕ້ອງໄດ້
ດັ່ງນັ້ນຈຶ່ງມີຄວາມຜິດພາດສູງ. ສິ່ງທີ່ເຮັດໃຫ້ມີຄວາມຜິດພາດນັ້ນມີຢ່າງຫຼວງຫຼາຍ
ແຕ່ໃນທີ່ນີ້ຂໍກ່າວພຽງແຕ່ 2 ຢ່າງຄື.
-
ຄວາມຜິດພາດທີ່ເກີດຈາກນັກຮຽນເອງ ເຊັ່ນ: ໃນມື້ກວດກາ ຫຼື ສອບເສັງນັ້ນ
ນັກຮຽນຜູ້ໃດຜູ້ໜຶ່ງອາດຈະມີສຸຂະພາບບໍ່ດີ ມີຄວາມກັງວົນໃຈ ຫຼື
ມີອາລົມບໍ່ດີ ຕຽມຕົວບໍ່ດີ ທຸດຈະລິດໃນການສອບເສັງ ແລະ ອື່ນໆ.
-
ຄວາມຜິດພາດທີ່ເກີດຈາກສະພາບແວດລ້ອມພາຍນອກ ເຊັ່ນ: ສະພາບຫ້ອງສອບເສັງບໍ່ດີ ມີສຽງລົບກວນຈາກພາຍນອກ ຄຳຖາມບໍ່ຊັດເຈນ
ກຳມະການຄວບຄຸມຫ້ອງເສັງເຄັ່ງຄັດເກີນໄປ ຫຼືໂຍະຍານເກີນໄປ
ເປີດໂອກາດໃຫ້ມີການທຸດຈະລິດໃນການສອບເສັງ ແລະ ອື່ນໆ.
ງ.
ຜົນຂອງການວັດຜົນການສຶກສາສະແດງໃນຮູບຂອງການພົວພັນ
ຜົນຂອງການວັດຜົນການສຶກສາຍາມໃດກໍສະແດງອອກໃນຮູບຂອງຄະແນນ
ແຕ່ຄະແນນຕົວດຽວນັ້ນບໍ່ສາມາດທີ່ຈະຕີຄວາມໝາຍໄດ້ວ່ານັກຮຽນຜູ້ນັ້ນໄດ້ຄະແນນຫຼາຍ
ຫຼື ໜ້ອຍ ຫຼືວ່າ ນັກຮຽນຜູ້ນັ້ນເກັ່ງ ຫຼື ອ່ອນ. ຖ້າຢາກໃຫ້ຄະແນນທີ່ໄດ້ນັ້ນມີຄວາມໝາຍຕ້ອງເອົາໄປປຽບທຽບກັບຂໍ້ມູນຢ່າງອື່ນອີກເຊັ່ນ.
-
ໄປປຽບທຽບກັບຄະແນນເຕັມ. ຕົວຢ່າງ ທ້າວ ສົມພອນ ໄດ້ຄະແນນ 7 ຈາກຄະແນນເຕັມ 10 ກໍຖືວ່າລາວໄດ້ຄະແນນສູງສົມຄວນ.
-
ໄປປຽບທຽບກັບຄະແນນສະເລ່ຍຂອງຫ້ອງ. ຕົວຢ່າງ ທ້າວ ສົມພອນ ໄດ້ຄະແນນ 7 ແຕ່ຄະແນນສະເລ່ຍຂອງຫ້ອງໄດ້ 8 ກໍສະແດງວ່າລາວໄດ້ຄະແນນທີ່ຂ້ອນຂ້າງຕ່ຳກ່ວາໝູ່ໃນຫ້ອງດຽວກັນ.
-
ໄປປຽບທຽບກັບຄາດໝາຍທີ່ວາງໄວ້. ຕົວຢ່າງ ທ້າວ
ສົມພອນ ໄດ້ຄະແນນ 7 ແຕ່ຄະແນນຄາດໝາຍແມ່ນ 5. ດັ່ງນັ້ນ ລາວຈຶ່ງໄດ້ລື່ນຄາດໝາຍທີ່ວາງໄວ້.
ຈ.
ການວັດຜົນການສຶກສາເປັນການວັດທີ່ບໍ່ມີ
0 ແທ້ ຫຼື 0
ສົມບູນ
ການວັດຜົນການສຶກສາຕ່າງກັບການວັດແທກລວງຍາວ
ແລະ ການຊັ່ງນ້ຳໜັກຫຼາຍ ເຊັ່ນ ລວງຍາວ 0 cm. ໝາຍຄວາມວ່າບໍ່ມີຄວາມຍາວເລີຍ
ຫຼື ນ້ຳໜັກ 0 Kg ກໍໝາຍຄວາມວ່າບໍ່ມີນ້ຳໜັກເລີຍເໝືອນກັນ ສ່ວນການວັດຜົນການສຶກສາ
ຖ້ານັກຮຽນຄົນໃດຄົນໜຶ່ງຫາກໄດ້ຄະແນນ 0 ບໍ່ໄດ້ໝາຍຄວາມວ່ານັກຮຽນຄົນນັ້ນບໍ່ມີຄວາມຮູ້ໃນວິຊານັ້ນເລີຍ
ນັກຮຽນຄົນນັ້ນມີຄວາມຮູ້ໃນວິຊານັ້ນຢູ່
ແຕ່ເຮົາບໍ່ໄດ້ຖາມໃນສິ່ງທີ່ເຂົາຮູ້. ດັ່ງນັ້ນ ການວັດຜົນການ
ສຶກສາຈຶ່ງບໍ່ມີ 0 ສົມບູນ.
ไม่มีความคิดเห็น:
แสดงความคิดเห็น